ഒരു മഴത്തുള്ളിയായ്‌ നീ വീണാൽ
നെഞ്ചിലേറ്റ്‌ വാങ്ങും മണ്ണാകും ഞാൻ
കര മുറിഞ്ഞ്‌ ഒഴുകും പുഴയായാൽ
ഉള്ളു നനയും ചെറുകാടാകാം ഞാൻ
ഒരു കാറ്റായ്‌ നീ വീശുമ്പോൾ
ഞാനതിൽ പാറും കടലാസ്പൂവ്‌
നിഴലായ്‌ നീ മാറിയാൽ
അതിലെ ഇരുളും വെളിച്ചവും ഞാൻ
തീയായ്‌ നീ ഉണരുമ്പോൾ
അതിൽ പുണരും കനലാകും ഞാൻ
സ്വരമായ്‌ നീ ഒഴുകുമ്പോൾ
ഞാനതിൽ കൂടും ശ്രുതിയാകും
മണ്ണിൻ നനവായ്‌ നീ പടരുമ്പോൾ
മുളച്ചുയരും കൂണുകളാകും ഞാനും.
....................
കനവറിയാത്ത കരളറിയാത്ത
കഥകൾ എൻ കണ്ണുകൾ മൂടട്ടെ
തണുപ്പറിയാത്ത തണലറിയാത്ത
നിനവുകളെൻ വഴിയിൽ നിറയട്ടെ
പടവറിയാത്ത നടപ്പറിയാത്ത
ദൂരങ്ങളീ കഥയിനി പറയട്ടെ
ചേർന്ന് കിടന്നെൻ നെഞ്ചിൻ
ചൂട് നിൻ നെഞ്ചിനാൽ അണയട്ടെ.
No comments:
Post a Comment